Михайловскæйы райдиан скъолайы цалцӕг кӕронмӕ фӕхæццæ кæны. Мидæггаг куыстытæ иууылдæр фесты. Ныртæккæ ма къултæ ахорынц æмæ кабинеттӕ ӕфснайынц. Ахуыры азы размæ æппæт дæр уыдзæн цæттæ. "Зӕронд ӕрмӕджытӕ уал бафснайдтам. Уый фӕстӕ скодтам рухс ӕмӕ интернет. Пъолтӕ слӕгъз кодтам ӕмӕ къултӕ байсæрстам. Ноджы рудзынджы тӕрхӕджытӕ ӕмӕ дуæрттæ сӕвӕрдтам. Ныртӕккӕ ма баззад ӕрмӕст къултӕ сахорын, линолеум сæвӕрын ӕмӕ плинтустӕ бафидар кӕнын".  Цалцӕг райдыдта мартъийы кӕрон. Аразджытӕ ӕппӕт ӕрмӕджытӕ дӕр афоныл ластой. Уымӕ гӕсгӕ куыст бакодтой тагъд ӕмӕ ӕнӕ фӕстиатæй. "Ныридӕгӕн сӕвӕрдтам зынгсирвӕзтон ӕдасдзинады, донӕввонгады ӕмӕ хъармгӕнӕн системӕтӕ. Кусджытӕ къултӕ байсæрстой ӕмӕ плиткӕ сӕвӕрдтой. Электрикӕ ӕмӕ сантехникӕ иууылдӕр цӕттӕ сты. Баззад ма дзы ӕрмӕст кӕронбӕттӕн фӕлыст". Фӕлӕ цалцӕг æнцонæй нæ бафтыд къухы. Скъола у зӕронд. Сарӕзтой йӕ 1913-æм азы. Уый тыххæй бæстыхайы иуӕй-иу хӕйттӕ ӕнӕхъӕнӕй ивинаг фесты. Ноджы къултӕ уыдысты къуыппытӕ-дзыхъхъытӕ. Аразджыты бирӕ рæстæг бахъуыд, цæмæй сæ слӕгъз кӕной. "Агуыридур ӕмӕ уӕлхӕдзар дæр зæронд сты. Хъӕдын цæджындзтæ дæр бынтондӕр бамбыд сты. Уымӕ гӕсгӕ сæ æгасæй дæр раивтам. Цалцӕджы размӕ скъолайы санузелтæ нӕ уыд. Сарӕзтам 3 ног санузелы: лæппутæн, чызджытæн ӕмӕ ахуыргӕнджытӕн. Фӕстаг цалцӕг ам уыд 2012-æм азы. Фӕлӕ уӕд сног кодтой ӕрмӕст цалдӕр кабинеты. Уый фӕстӕ та — æрмæст аивгæнæн куыстытæ. Ахуыргæнæндон ноггонд æрцыд паддзахадон программӕ "Модернизация школьных систем образования"-мæ гæсгæ. "Республикӕйы хицауад бӕрӕг кӕнынц, цалцӕг кӕнын кӕй хъӕуы, ӕппӕт уыцы агъуыстытӕ. Ахуырады министрад ӕмӕ районы разамынд курдиат балæвæрдтой, цæмæй не скъоламæ дæр фæкæсой. Афтæ йӕ пъланмӕ бахастой. Цалцӕг кӕнынӕн ӕхца рахай кодтой федералон ӕмӕ бынӕттон бюджеттӕй. Ныр ахуыргӕнинӕгтӕ, ныййарджытӕ ӕмӕ хъӕуы цӕрджытӕ иууылдӕр тынг ӕнхъӕлмӕ кӕсынц скъола кæд байгом уыдзæн, уымæ". Скъоламӕ ӕрбаласдзысты ног мебель дæр. Ныридӕгӕн ӕй балхӕдтой ӕмӕ йӕ рӕстӕгмӕ ӕндӕр агъуысты дарынц. Цалцӕджы фæстæ сæ сӕвӕрдзысты кълӕсты. Ӕдӕппӕтӕй ацы райдиан скъолайы ахуыр кӕндзысты 300 сывӕллоны бӕрц.