«Бэлигэй туяа» гэһэн уласай эрдэмэй ба дүршэл дадалай бага хурал түрэл хэлэеэ наринаар сахижа ябаһан һурагшадые дахинаа нэгэдүүлбэ. Найман секцидэ ажал үргэнөөр ябуулагдажа, хабаадагша бүхэн шэнжэлэлгынгээ түсэлнүүды дурадхан хамгаалһан байна. Тиигэжэ арбадахи классай һурагша Михаил Наханцаков «Гэсэр» гэһэн үльгэр соо агууехэ баатарай арада байһан эхэнэрэй үүргэ шэнжэлэн, шэнээр хаража үзэхэ гэжэ шиидээ.